കുഞ്ഞാറ്റക്കിളി
"പാടത്തിന്നക്കരെ ചോലയ്ക്കടുത്തൊരു
നാഴിപ്പയറു വിതച്ചിട്ടുണ്ടേ..."
കുഞ്ഞാറ്റക്കൂട്ടില് വിരുന്നിനു വന്നൊരു
ചങ്ങാലിച്ചങ്ങാതി ചൊല്ലി മെല്ലേ..
"ഇന്നു ഞാനാവഴി പോന്നതില്പ്പിന്നെയാ-
പൂങ്കിളിക്കൂട്ടങ്ങള് വന്നിരിയ്ക്കാം..
ആവോളം വേഗത്തിലെത്തിയാലൊത്തിരി
വാരിക്കൊറിച്ചിടാം, കൊണ്ടുപോരാം.."
പച്ചപ്പയറിന്നു മോഹിച്ചുവെങ്കിലും
കുഞ്ഞാറ്റ പണ്ടേ മടിയനത്രേ..
അരിമണി നാലുണ്ട് നാളേയ്ക്കു; മറ്റന്നാള്
പോകാമെന്നോതി കളിച്ചുവത്രേ..
രണ്ടാംനാള് കാലത്തു കത്തും വിശപ്പോടെ
കുഞ്ഞാറ്റപ്പൈങ്കിളി ചെന്ന നേരം..
പയറെല്ലാം മുള നീട്ടി പുഞ്ചിരിപ്പൂ, ചെറു
കുളിരുള്ള കാറ്റേറ്റിട്ടാനന്ദിപ്പൂ..
പൊരിയുന്ന വയറോടെ, കുഞ്ഞാറ്റക്കിളി- തന്റെ
മടിയെപ്പഴിച്ചു മിഴി തുടച്ചൂ
ഇന്നത്തെ നേരത്തു ചെയ്യേണ്ട കാര്യങ്ങള്
നാളേയ്ക്കു മാറ്റല്ലേ കൂട്ടുകാരേ.
25 അഭിപ്രായങ്ങള്:
കുഞ്ഞിക്കവിത ഇഷ്ടമായി.
“അന്നന്നു ചെയ്യേണ്ട കാര്യങ്ങളൊന്നുമേ
പിന്നേയ്ക്കു പിന്നേയ്ക്കു മാറ്റിടാതെ
എന്നുരചെയിതിതാ നല്ലോരുപാട്ടുമായി-
മ്മഷിത്തണ്ടിന്റെ ചന്ദ്രകാന്തം.”
“മനോഹരം” എന്ന വാക്ക് മതിയോ ഇതിനെ വിശേഷിപ്പിക്കാന്? വളരെ നന്നായിട്ടുണ്ട്. നല്ല ഗുണപാഠം, ലളിതമായ വാക്കുകള്, നല്ല ഈണം, എല്ലാം ഈ കുഞ്ഞിക്കവിതയെ മികവുറ്റതാക്കിയിട്ടുണ്ട്. കുഞ്ഞിക്കവിതകളുടെ സാധാരണ ഈണങ്ങളില്നിന്നും ഒരു പടികൂടിക്കടന്ന് മറ്റൊരു നല്ല താളവും ഈണവുമുള്ള ഈ കുട്ടിക്കവിത അവതരിപ്പിക്കുകവഴി ചന്ദ്രകാന്തം ഒരിക്കല്ക്കൂടി കവിതയെഴുത്തില് തനിക്കുള്ള കഴിവ് ഭംഗിയായി ഇവിടെ വരച്ചിട്ടിരിക്കുന്നു. അഭിനന്ദനങ്ങള്!
“ഇന്നത്തെ നേരത്തു ചെയ്യേണ്ട കാര്യങ്ങള്
നാളേയ്ക്കു മാറ്റല്ലേ കൂട്ടുകാരേ.”
നല്ലൊരു ഗുണപാഠം തന്നെ. വളരെ നന്നായിരിയ്ക്കുന്നു, ചേച്ചീ.
:)
പച്ചപ്പയറിലൊരിത്തിരി തന്നാലോ
അപ്പച്ചന് തന്നോരുടുപ്പു നല്കാം
ഗലക്കന് മാഷേ......
വളരെ നല്ല കുട്ടിക്കവിത ചന്ദ്രകാന്തം..
കവിതയിലെ ഗുണപാഠം എല്ലാ കൊച്ചുകൂട്ടുകാരും (‘വല്യകൂട്ടുകാര്‘ തീര്ച്ചയായും..) ജീവിതത്തില് പ്രായോഗികമാക്കേണ്ടതാണ്.
ചെറുപ്പത്തില് മുത്തശ്ശി എന്നോട് പറയാറുള്ള സംസ്കൃത ശ്ലോകം ഈ അവസരത്തില് ഓര്ത്തുപോകുന്നു.
“ഉദ്യമേനൈവ സിദ്ധ്യന്തി കാര്യാണി ന മനോരഥൈഃ
നഹി സുപ്തസ്യ സിംഹസ്യ പ്രവിശന്തി മുഖേ മൃഗാഃ ”
ഇതേ സന്ദേശം തന്നെയാണ് ഈ കുട്ടിക്കവിതയിലൂടെയും കൂട്ടുകാരിലേക്കെത്തുന്നത്!
“ ഉദ്യമേനൈവ സിദ്ധ്യന്തി കാര്യാണി ന മനോരഥൈഃ“
-എന്നുവച്ചാ, ഇപ്പോള് ചെയ്യേണ്ട ഒരു ഉദ്യമം, കാര്യം, അത് അപ്പോള് തന്നെ ചെയ്യണം, അല്ലാതെ ഈ കവിതയിലെ കുഞ്ഞാറ്റക്കിളി ചെയ്തത് പോലെ ഇന്ന് ചെയ്യാം നാളെ ചെയ്യാം എന്ന് മനോരഥം, സ്വപ്നം, കണ്ട് നടന്നിട്ട് കാര്യമില്ല.
“നഹി സുപ്തസ്യ സിംഹസ്യ പ്രവിശന്തി മുഖേ മൃഗാഃ ”
- ഉറങ്ങിക്കിടക്കുന്ന സിംഹത്തിന്റെ അടുത്തേക്ക് അതിന്റെ ഇര നടന്ന് ചെല്ലുകയില്ല. സിംഹത്തിന് ഇരയെ വേണമെങ്കില് സിംഹം ഇരതേടിപ്പോകുകതന്നെ ചെയ്യണം.
മടിപിടിച്ചിരിക്കാതെ, ചുമ്മാ സ്വപ്നംകണ്ടിരിക്കാതെ, ചെയ്യേണ്ട കാര്യങ്ങള് ചെയ്യേണ്ടസമയത്ത് ചെയ്യേണ്ടപോലെ ചെയ്താല് നമുക്ക് ജീവിതത്തില് യാതൊരുവിധ ബുദ്ധിമുട്ടുകളും ഉണ്ടാവില്ല. അത് തന്നെയാണ് ഈ കവിതയിലൂടെ കൂട്ടുകാര്ക്ക് ലഭിക്കുന്ന ഒരു നല്ല സന്ദേശം.
കവിത വളരെ നന്നായി ചന്ദ്രകാന്തം.
അഭിലാഷ് :-)
കുട്ടിക്കവിത വല്ല്യ ഇഷ്ടമായീ ചേച്ചീ...
വളരെ നല്ല കവിത ചന്ദ്രകാന്തം... വളരെ നല്ലൊരു സന്ദേശം കുട്ടികള്ക്ക് വളരെ ലളിതമായി പറഞ്ഞ് കൊടുത്തിരിക്കുന്നു...
ഇതായിരിക്കും ഇന്ന് പാച്ചുവിനായി ഞാന് പറഞ്ഞ് കൊടുക്കുന്ന കഥ... നന്ദി!
കുട്ടികവിത നന്നായി ചന്ദ്രേ.
എന്നാലും, വിതച്ചിടത്തു നിന്നു തന്നെ അടിച്ചു മാറ്റാന് പറയുന്നതിലെ അനര്ത്ഥങ്ങള് അറിയാതെ പോയോ എന്നൊരു ശങ്ക.
-സുല്
എന്ത് പറഞ്ഞാലും നാളെ നാളെ എന്ന് പറയുന്ന ഒരാളെ എനിക്കടുത്തറിയാം. ഈ കവിത ഞാനാ ആള്ക്ക് ഫോര്വേഡ് ചെയ്യുന്നു.
-നന്നായിരിക്കുന്നൂ ചന്ദ്രേ!
ചന്ദ്രകാന്തം കൊണ്ട് നാലുകെട്ട് കെട്ടിയപോലുണ്ട്..
നന്നായിരിക്കുന്നൂ.
അതിലൂടെ കുറച്ച് അര്ത്ഥവത്തായ ഗുണപാഠങ്ങളും പറഞ്ഞിരിയ്ക്കുന്നൂ.!!
ചന്ദ്രകാന്തം,
നല്ലൊരു ഗുണപാഠമുള്ള കുഞ്ഞിക്കവിത ഹൃദയത്തോടു അടുത്തു നില്ക്കുന്നു.....
"അന്നന്നു ചെയ്യേണ്ട കാര്യങള് ചെയ്തില്ലാല് അന്നം മുടങ്ങും അതു നിശ്ചയം താന്"
അഭിനന്ദനങ്ങള്!
സുല് ജീ,
വിതച്ചവന്റെ തന്നെ ചുമതലയാണ് അത് കാത്തുസൂക്ഷിയ്ക്കേണ്ടതും. അത് അവന് മടികൂടാതെ ചെയ്തേ പറ്റൂ.
പിന്നെ, വിതച്ചതായാലും, വിളഞ്ഞതായാലും കിളിയുടെ കണ്ണില് ഒരുപോലെയല്ലേ. മനുഷ്യന്റെ കാര്യത്തിലല്ലേ "തിരിച്ചറിവ്" എന്ന പ്രയോഗം സാധ്യമാകൂ.
സുല്ലേ ചന്ദ്രകാന്തമേ തര്ക്കം നിര്ത്തൂ. ഇവിടെ വന്നിട്ടുപോയ കുഞ്ഞുങ്ങള്ക്കാര്ക്കും സുല്ല് പറഞ്ഞതുപോലെയൊരു സംശയം ജനിച്ചിട്ടില്ല..എന്നുമാത്രവുമല്ല അവര്ക്കെല്ലാം കവിതയുടെ സാരാംശം മാത്രമേ മനസ്സിലേക്ക് കയറിയിട്ടും ഉള്ളൂ.
ന്നെ പോലുള്ള കൊച്ചു കുട്ട്യോള്ക്ക് ഇമ്മിണി ഇസ്ടായിക്കവിത..
ചന്ദ്രേച്ചിച്ചും മച്ചിത്തണ്ടിനും ഒത്തിരി ഒത്തിരി ആച്ചംസകല്..:)
ചെറിയ കുസൃതിക്കുരുന്നുകള്ക്ക് ഈണത്തില് ചൊല്ലിക്കൊടുക്കാന് പറ്റിയ പാട്ട്,ഇഷ്ടമായി ചന്ദ്രകാന്തം.
കിണ്ണംകാച്ചി കവിത
എന്തു സുന്ദരമീ കവിത....
ലളിതം, സുന്ദരം!
നല്ല ഈണം!
നന്നായിരിയ്ക്കുന്നു...
കുട്ടികള്ക്കുള്ളതാണെങ്കിലും എനിക്കിതു കേട്ടിട്ടു മനപ്രിങ്ങ്യാസം വരുന്നു. ഞാന് പോയി ഇശ്ശി പയറുപെറുക്കീട്ടു വരാം!
വളരെ വളരെ നല്ല കുഞ്ഞിക്കവിത, ചന്ദ്രേ.
കഞ്ഞുക്കവിത അതേ കുഞ്ഞു ചിന്തയോടെ രസിച്ചു വായിച്ചു രസിച്ചു... :)
ഈ കവിത വളരെ ഭംഗിയായിരിക്കുന്നു. അതുപോലെ നല്ലൊരു ഗുണപാഠവും.
കൊച്ചുകുട്ടികളെ പാടിക്കേള്പ്പിക്കാനും കഥപറഞ്ഞുകൊടുക്കാനും ധാരാളം വിഭവങ്ങള് മഷിത്തണ്ടില് പ്രസിദ്ധീകരിക്കുന്ന എല്ലാ കൂട്ടുകാര്ക്കും അഭിനന്ദനങ്ങള്... ആശംസകള്.
അതി മനോഹരമായ കവിത!
ഇതാ ഒരു നാടന് പാട്ടിന്റെ ഈണത്തില് അത് ഇവിടെ കേള്ക്കാം: http://tinyurl.com/2swsqr
Post a Comment