ഓണനിലാവ്
ചിങ്ങം പിറന്നപ്പോളോണവും കൊണ്ടെന്റെ
ഓമനത്തുമ്പികൾ പാറിവന്നൂ..
മാനത്തെപ്പൊൻകതിരൊന്നാകെ വാരി-
പ്പുതച്ചെന്റെ പാടം കതിരണിഞ്ഞൂ..
ആഞ്ഞിലിക്കൊമ്പത്തെ,ക്കൂട്ടിലെപ്പൂങ്കിളി
ഓണപ്പാട്ടോരോന്നും പാടിടുന്നൂ..
ഓരോരോ കാട്ടിലും മേട്ടിലും മൊട്ടിട്ടൊ-
രായിരം പൂക്കളുണർന്നു വന്നൂ..
അത്തക്കളത്തിലെ ചേലൊത്ത പൂക്കളി-
ലിത്തിരിപ്പൊൻവെയിലെത്തി നിന്നൂ..
ചിത്തിരപ്പൂക്കളോടൊത്തു വിരിഞ്ഞൊരു
തെച്ചിപ്പൂ മുറ്റത്തു പുഞ്ചിരിച്ചൂ..
തൃക്കാക്കരപ്പന്നു പൂപ്പട കൂട്ടുവാൻ
തുമ്പക്കുടങ്ങളൊരുങ്ങി വന്നൂ..
പത്താം നാളെത്തുന്നൊരോണപ്പുലരിയ്ക്കു
നാടാകെ പൂത്താലമേന്തി നിന്നൂ..
മാവേലിത്തമ്പുരാനെത്തും മെതിയടി-
കേൾക്കുന്നു; പൂവിളി പൊങ്ങിടുന്നൂ..
മാലോകരെല്ലാരുമൊന്നായി വാണൊരു
കാലത്തിന്നാനന്ദമോർത്തിടുന്നൂ..
സ്നേഹത്തിൻ പൂക്കളം വാടാതെ നിൽക്കുവാ-
നോണനിലാവതിൽ പെയ്തിടുന്നൂ..
മണ്ണിന്റെ നെഞ്ചിലെപ്പാലാഴി നമ്മളി-
ലെന്നും മധുരം പകർന്നിടുന്നൂ..
*******************************************
28 അഭിപ്രായങ്ങള്:
ഒരു പൂമ്പാറ്റക്കുഞ്ഞിന് ഓണപ്പാട്ടുപാടാന് വേണ്ടി എഴുതീതാണ്.
എല്ലാ കുഞ്ഞുമനസ്സുകള്ക്കും വേണ്ടി ഇതിവിടെ പോസ്റ്റുന്നു.
വാക്കുകള് മുത്തുപോല് കോര്ത്തിണക്കീനല്ല
മാലകള് കോര്ക്കുമീ ‘ചന്ദ്രകാന്തം’ !
ലാവണ്യമോലും പദങ്ങളും താളവും
ഈണവും ചേലൊത്ത പ്രാസങ്ങളും
ചായങ്ങളൊട്ടേറെച്ചാലിച്ചെഴുതിയ
വര്ണ്ണചിത്രങ്ങളും സംഗമിക്കും
ഓമല്ക്കവിതകളേറെ രചിക്കുവാ-
നേകട്ടെ ലക്ഷ്മി, വരപ്രസാദം.
ആദ്യകമന്റിനോടൊപ്പമീ ‘തേങ്ങയും’
പൊട്ടിച്ചു സല്യൂട്ടടിച്ചിടുന്നേന് !! “ഠേ.....”
കലക്കീട്ടുണ്ട് ഈ കുട്ടിക്കവിത....
അഭിനന്ദനങ്ങള്
തൃക്കാക്കരപ്പന്നു പൂപ്പട കൂട്ടുവാൻ
തുമ്പക്കുടങ്ങളൊരുങ്ങി വന്നൂ..
പത്താം നാളെത്തുന്നൊരോണപ്പുലരിയ്ക്കു
നാടാകെ പൂത്താലമേന്തി നിന്നൂ..
മനോഹരം
ബ്ലോഗു മുറ്റം മെഴുകി വക്കുകള് കൊണ്ട് അതി ഭംഗിയായി ഒരു പൂക്കളം തീര്ത്തു ല്ലെ?
ഓഫീസ്സിലിരുന്ന് അറിയാതെ താളം പിടിച്ചു പോയി..
ഓണത്തേക്കാള് കേമം!
അത്തക്കളത്തിലെ ചേലൊത്ത പൂക്കളി-
ലിത്തിരിപ്പൊൻവെയിലെത്തി നിന്നൂ..
ചിത്തിരപ്പൂക്കളോടൊത്തു വിരിഞ്ഞൊരു
തെച്ചിപ്പൂ മുറ്റത്തു പുഞ്ചിരിച്ചൂ..
യ്യോ എത്ര രസമായിട്ടാ കവിത എഴുതുന്നെ..കുഞ്ഞു മനസ്സുകള്ക്കു വേണ്ടിയാണു പോസ്റ്റിയതെങ്കിലും ഈ വലിയ മനസ്സും കൊച്ചു കുഞ്ഞിന്റേതു പോലെ ആയി.
താങ്കളുടെ ബ്ലോഗ് വായിക്കാറുണ്ട്.നന്നാകുന്നുണ്ട്.
ഒരാഴ്ചയായി ഞാനും ബ്ലോഗിത്തുടങ്ങിയിരിക്കുന്നു...
സന്ദര്ശിക്കില്ലേ?
ഒന്നു കമന്റുകയില്ലേ?
ഓണം എന്ന മനോഹരമായ സങ്കല്പ്പ ലോകത്തേക്കു നമ്മെ കൊണ്ടു പോകുന്നു ഈ കൊച്ചു കവിതയും.
സുന്ദരം!
ഓണത്തിന്റെ വര്ണ്ണങ്ങളും സുഗന്ധവും സമൃദ്ധിയും ഇഴചേര്ത്തു നെയ്ത കവിതാ കൗതുകം.
അഭിനന്ദനങ്ങള്.
കമന്റാന് പോയിട്ട് വായിക്കാന് പോലും നേരമില്ലാത്തപ്പോഴാണു കവിത കാണുന്നത്. ചിലതിങ്ങനെയാണ് ഒരു തിരക്കിനേയും വകവയ്ക്കാതെയങ്ങ് ഇടിച്ചു കയറും പിന്നെ മിണ്ടാതെ പോവുന്നന്നതെങ്ങനെ ? :)
"ആഞ്ഞിലിക്കൊമ്പത്തെ,ക്കൂട്ടിലെപ്പൂങ്കിളി
ഓണപ്പാട്ടോരോന്നും പാടിടുന്നൂ..
ഓരോരോ കാട്ടിലും മേട്ടിലും മൊട്ടിട്ടൊ-
രായിരം പൂക്കളുണർന്നു വന്നൂ..."
മനസ്സില് നിന്നും മായാതെ കിടക്കുന്ന മറവികളുടെ കിനിവ്. നന്നായിരിക്കുന്നുനെന്നു പറയേണ്ടതില്ലല്ലൊ.
-സുല്
ഒരു ഓണപ്പായസം തന്നെ
വളരെ നന്നായിരിക്കുന്നു ഈ ഓണപാട്ട്. പണ്ട് പറഞ്ഞത് പോലെ ഇതൊക്കെ ആരേലും പാടി റെക്കോര്ഡ് ചെയ്തിട്ടാല് മക്കള്ക്കൊരു വിരുന്നായേനെ. അപ്പുവിന്റെ കമന്റ് കവിതയും മനോഹരം.
മനോഹരമായ വരികൾകൊണ്ട് ബൂലോഗ്ഗത്തൊരു പൂക്കളമിട്ടിരിക്കുന്നു.
നന്നായിരിക്കുന്നു.
ഓണപ്പാട്ട് നന്നായിട്ടുണ്ട്.
ചന്ദ്രകാന്തത്തിന്റെ കവിത കണ്ടപ്പോഴേ ദാ തത്തകളുമെത്തിയല്ലോ പാടത്ത്. ഹി ഹി..
ആവണിപ്പാടത്തിലെത്തുന്ന തത്തകള്
പൊന്നിന് കതിര്ക്കുല കൊക്കിലാക്കി
ഈണത്തില് മൂളിപ്പറന്നുയരുന്നിതാ
പച്ചവിരിച്ച പൂന്തോപ്പു പോലെ....
എനിക്ക് വളരെ ഇഷ്ടമായി ഈ കവിതയും.
ഒരു കുട്ടിമനസ്സും കൂടിയുണ്ടെന്ന് തെളിയിച്ചിരിക്കുന്നു.. :)
മനോഹരമായിരിക്കുന്നു,പെട്ടെന്ന്
പാടാനും കഴിയും.
മാനത്തെപ്പൊൻകതിരൊന്നാകെ വാരി-
പ്പുതച്ചെന്റെ പാടം കതിരണിഞ്ഞൂ..
-എന്റമ്മോ........!
എല്ലാ ‘കുഞ്ഞു‘മനസ്സുകള്ക്കും വേണ്ടി ....(അപ്പൂനായിരിക്കും, ല്ലേ?)
സുന്ദരം ഈ ഓണനിലാവ്...
ലളിതസുന്ദരമായ വരികള് ചന്ദ്രകാന്തം. താളമില്ലാത്തവനും പാടിയാല് ഒരു താളം തോന്നും.
നിറഞ്ഞ മനസ്സോടെ... ഓണനിലാവ് ആസ്വദിച്ച എല്ലാര്ക്കും..നന്ദി.
ഹായ് എത്ര സുന്ദരമായ ഓണക്കവിത. നല്ല താളത്തില് പാടാം .
അപ്പുവിന്റെ കവിതക്കമന്റ് ഉഗ്രന് !
എന്നാലും ഒരു കാര്യം, ലക്ഷ്മിയല്ല സരസ്വതിയാണ് ആ വരപ്രസാദം ഏകുക.
( ലക്ഷ്മി എന്നയിടത്ത് ദേവി എന്നെഴുതിയാല് മതി . ഇതൊരു ഒന്നാംതരം കവിത)
മനോഹരം..
ഒറയടിക്ക് വായിച്ച്ചുപോകാന് കഴിയുന്ന കവിത..
കുഞുങ്ങള്ക്ക് മാത്രമല്ല,വല്യോര്ക്കും
ഈണത്തില് പാടാന് കഴിയും വിധം
നന്നായി കോറിയിട്ടിരിക്കുന്നു
ഇങ്ങനത്തെ കവിതേണ് ഇക്കിസ്ടം,
നന്ദീണ്ട്ട്ടാ..
മനുസന് മച്ചിലാവണ ഭാസേലും എഴുതാനറിയാല്ലെ,
ശുക്രന്..;)
ഇതൊക്കെ നമ്മുടെ കുഞ്ഞുങ്ങളുടെ ചെവീലെത്തുന്നില്ലല്ലോന്നോര്ക്കുമ്പോഴാണ് സങ്കടം
ടെമ്പ്ലേറ്റ് അസ്സല് ! :)
Post a Comment